އަހަރުގެ މިހާތަނަށް އެންމެ ގިނައީ ވައްކަން، ކުށްކުރުން އެންމެ ބޮޑަށް އިތުރުވީ ޖުލައި މަހު
މަސްތުވާތަކެއްޗާއި ވައްކަމުގެ މައްސަލަތައް އިތުރުވެ، މި އަހަރުގެ މިހާތަނަށް ފުލުހުންނަށް އެންމެ ގިނައިން މައްސަލަ ރިޕޯޓުކުރި މަހަކަށް ނިމިދިޔަ ޖުލައި މަސް ވެއްޖެއެވެ. ފުލުހުންގެ ތަފާސްހިސާބުތަކުން ދައްކާ ގޮތުގައި އަހަރުގެ މިހާތަނަށް ޖުމްލަ 7،616 މައްސަލަ ހުށަހަޅާފައިވާއިރު، އޭގެ ތެރެއިން 1،170 މައްސަލަ ރިޕޯޓުކޮށްފައިވަނީ ޖުލައި މަހުގައެވެ.
ތަފާސްހިސާބުތަކަށް ބަލާއިރު، އަހަރުގެ ކުރީކޮޅަށްވުރެ މެދުތެރޭގައި ކުށްކުރާ މިންވަރު ވަނީ އިތުރުވެފައެވެ. ޖަނަވަރީ މަހު 1،108 މައްސަލަ ރިޕޯޓުކުރުމަށްފަހު ފެބުރުވަރީ މަހު އެ އަދަދު 954 އަށް ދަށްވިއެވެ. ނަމަވެސް އޭގެ ފަހުން ކޮންމެ މަހަކުވެސް މައްސަލަތައް ވަނީ އިތުރުވެފައެވެ. އެގޮތުން މާޗު މަހު 973، އޭޕްރިލް މަހު 1،025، މެއި މަހު 1،056 އަދި ޖޫން މަހު 1،104 މައްސަލަ ހުށަހަޅާފައިވެއެވެ. ހިނގަމުންދާ އޯގަސްޓު މަހުގެ މިހާތަނަށް 226 މައްސަލައެއް ވަނީ ރިޕޯޓުކޮށްފައެވެ.
ޖުލައި މަހު އެންމެ ގިނައިން ހުށަހަޅާފައިވަނީ މަސްތުވާތަކެއްޗާ ގުޅުންހުރި މައްސަލަތަކެވެ. އެ މަހު ރިޕޯޓުކުރި މައްސަލަތަކުގެ 31.7 އިންސައްތަ ނުވަތަ 371 މައްސަލައަކީ މަސްތުވާތަކެތީގެ މައްސަލަތަކެވެ. ދެވަނައަށް އެންމެ ގިނައީ ވައްކަމެވެ. އެއީ ޖުމްލަ މައްސަލަތަކުގެ 24.2 އިންސައްތަ ހިއްސާކުރާ 283 މައްސަލައެވެ. މީގެ އިތުރުން ޖުލައި މަހު 240 ޓްރެފިކް އެކްސިޑެންޓް ފުލުހުންނަށް ރިޕޯޓުކޮށްފައިވެއެވެ.
ޖުލައި މަހުގެ އެހެނިހެން ކުށްތަކުގެ ތަފުސީލަށް ބަލާއިރު، ގެއްލިފައިވާ ތަކެތީގެ 80 މައްސަލައާއި، ހަމަލާދިނުމުގެ 61 މައްސަލަ އަދި ތަޅާފޮޅުމުގެ 51 މައްސަލަ ހިމެނެއެވެ. ގެވެށި އަނިޔާއާއި ޖިންސީ ކުށްތަކުގެ ގޮތުގައި ކޮންމެ ބާވަތަކުން 24 މައްސަލަ ރިޕޯޓުކޮށްފައިވާއިރު، ޚިޔާނާތްތެރިވުމުގެ 18 މައްސަލައާއި ފޭރުމުގެ 12 މައްސަލަ ފުލުހުންނަށް ވަނީ ހުށަހަޅާފައެވެ.
ޖުލައި މަހު މަސްތުވާތަކެތީގެ މައްސަލަތައް ގިނަވި ނަމަވެސް، މުޅި އަހަރުގެ މިހާތަނަށް ބަލާއިރު ރާއްޖޭގައި އެންމެ ގިނައިން ހިނގާފައިވަނީ ވައްކަމެވެ. އަހަރުގެ މިހާތަނަށް ރިޕޯޓުކުރި 7،616 މައްސަލައިގެ 27.6 އިންސައްތަ ނުވަތަ 2،103 މައްސަލައަކީ ވައްކަމެވެ. އަދި ދެވަނައަށް އެންމެ ގިނައިން ރިޕޯޓުކުރި ޓްރެފިކް އެކްސިޑެންޓުގެ 1،846 މައްސަލައާއެކު، މުދަލުގެ ރައްކާތެރިކަމާއި މަގުމަތީގެ ސަލާމަތްތެރިކަމަށް ބޮޑެތި ގޮންޖެހުންތަކެއް ހުރިކަން ތަފާސްހިސާބުތަކުން ހާމަވެއެވެ.