އޯޓިޒަމަށް ފަރުވާކުރުމުގައި ބޮޑު ކުރިއެރުމެއް: ސިކުނޑި ބޮޑުވުމަށްފަހުވެސް ފަރުވާކުރެވިދާނެކަން ސައިންސްވެރިން ހޯދައިފި
އޯޓިޒަމް ސްޕެކްޓްރަމް ޑިސްއޯޑާ (އޭއެސްޑީ) އާ ގުޅުންހުރި ސިކުނޑީގެ މައްސަލަތަކަށް ފަރުވާކުރުމުގައި އުންމީދީ އާ ގޮތެއް ދެކުނު ކޮރެއާގެ އިންސްޓިޓިއުޓް ފޯ ބޭސިކް ސައިންސް (އައިބީއެސް) ގެ ސައިންސްވެރިން ހޯދައިފިއެވެ. ދުނިޔޭގެ މަޝްހޫރު 'ނޭޗާ ކޮމިއުނިކޭޝަންސް' ޖާނަލްގައި ޝާއިއުކޮށްފައިވާ މި ދިރާސާއިން ދައްކާ ގޮތުގައި، ސިކުނޑި ބޮޑުވެ ނިމުމަށްފަހު ވެސް މިފަދަ ނާރުގެ މައްސަލަތަކަށް ކާމިޔާބުކަމާއެކު ފަރުވާދެވިދާނެއެވެ.
އައިބީއެސްގެ ޑިރެކްޓަރު އީންޖޫން ކިމް އިސްކޮށް ހަރަކާތްތެރިވި މި ދިރާސާގައި، ސައިންސްވެރިން ވަނީ ސިކުނޑީގެ ސެލްތަކުގެ މެދުގައި މުއާމަލާތްކުރުމަށާއި، އުނގެނުމަށާއި، ހަނދާން ބެހެއްޓުމަށް މުހިންމު ދައުރެއް އަދާކުރާ 'އެންއެމްޑީއޭ' ރިސެޕްޓާ (އެންއެމްޑީއޭއާރު) ގެ މަސައްކަތް އާންމު ހާލަތަކަށް ގެނެސްދީފައެވެ. މީގެ ކުރިން ސައިންސްވެރިން 'ޖީއެލްވައިޓީ1' ނަމަކަށް ކިޔާ ޓްރާންސްޕޯޓަރެއް ބްލޮކްކޮށްގެން މިކަން ކުރަން އުޅުމުން، ނޭވާލުމާއި ހަރަކާތްތައް ކޮންޓްރޯލްކުރާ ސިކުނޑީގެ ބައިތަކަށް ނޭދެވޭ އަސަރުތަކެއް ކުރިއެވެ.
ނަމަވެސް، އައިބީއެސްގެ ޓީމުން ވަނީ ވިސްނުމާ ގުޅޭ ސިކުނޑީގެ ބައިތައް ކަމަށްވާ ކޯޓެކްސް އަދި ހިޕޯކެމްޕަސްގައި ގިނައިން ހުންނަ 'އެސްއެލްސީ6އޭ20' ނަމަކަށް ކިޔާ ގްލައިސީން ޓްރާންސްޕޯޓާއަކަށް އަމާޒުކޮށްފައެވެ. އެންޓިސެންސް އޮލިގޯނިއުކްލިއޮޓައިޑްސް (އޭއެސްއޯ) ބޭނުންކޮށްގެން މި ޓްރާންސްޕޯޓާގެ މަސައްކަތް ދަށްކުރުމުން، އެންއެމްޑީއޭއާރުގެ މަސައްކަތް ރަނގަޅުވާކަން ސައިންސްވެރިންނަށް ކަށަވަރުވިއެވެ. މި ފަރުވާ ޓެސްޓުކުރީ އޯޓިޒަމް އަދި ފެލަން-މެކްޑާމިޑް ސިންޑްރޯމް ފަދަ ބަލިތަކާ ގުޅުންހުރި 'ޝޭންކް2' އަދި 'ޝޭންކް3' ޖީންގައި މައްސަލަ ހުރި މީދާތަކެއްގައެވެ.
މި ފަރުވާގެ ސަބަބުން ބޮޑެތި މީދާތަކުގެ އިޖުތިމާއީ ގުޅުންތަކާއި މުއާމަލާތްކުރުމުގެ ހުނަރު ރަނގަޅުވެ، ތަކުރާރުކޮށް ކުރާ ހަރަކާތްތައް މަދުވިއެވެ. މިއީ ސިކުނޑީގެ އުފެދުން ފުރިހަމަވުމަށްފަހު ވެސް އޯޓިޒަމްގެ މައްސަލަތަކަށް ފަރުވާދެވިދާނެކަން ސާބިތުކޮށްދިން މުހިންމު ހޯދުމެކެވެ. މީގެ އިތުރުން، ކްރިސްޕާ ޖީން އެޑިޓިން ބޭނުންކޮށްގެން އުފެއްދި އިންސާނުންގެ ސިކުނޑީގެ މޮޑެލްތަކެއްގައި (ކޯޓިކަލް އޯގަނޮއިޑްސް) މި ފަރުވާ ޓެސްޓުކުރުމުން ވެސް، އެންއެމްޑީއޭއާރުގެ މަސައްކަތް އާންމު ހާލަތަކަށް ބަދަލުވިކަން ފެނުނެވެ.
ތަހުލީލުތަކުން ދައްކާ ގޮތުގައި، އޭއެސްއޯ ފަރުވާގެ އެއް ޑޯޒް ދިނުމުން އޭގެ އަސަރު އެއްވެސް ނޭދެވޭ އަސަރެއް ނެތި މަދުވެގެން އަށް ހަފުތާއަށް ދެމިހުރެއެވެ. އެސްއެލްސީ6އޭ20 އިންހިބިޝަންއަކީ ސިކުނޑީގެ އެތެރޭގެ ސިގްނަލްތައް ކޮންޓްރޯލްކޮށްގެން ދެވޭ ފަރުވާއަކަށް ވުމުން، މިއީ އަމަލީ ގޮތުން ބޭނުންކުރަން މާ ފަސޭހަ ފަރުވާއެކެވެ. އޯޓިޒަމްގެ އިތުރުން، އެންއެމްޑީއޭއާރުގެ މަސައްކަތް ދަށްވުމަކީ ސްކިޒޮފްރީނިއާ އަދި އެހެނިހެން ނާރުގެ ބަލިތަކާ ވެސް ގުޅުންހުރި ކަމެއްކަމުން، މި ހޯދުމުގެ އަލީގައި އެހެން ބަލިތަކަށް ފަރުވާ ހޯދުމުގެ މަސައްކަތް ވެސް ކުރިއަށްދާނެއެވެ.